Plantun de Prouvènço

Pèr coumpara dos planto d'encò nostre

Plantago alpina & Amelanchier ovalis

Plantago alpina

Plantaginaceae

Nom en français : Plantain des Alpes.

Descripcioun :
L'erbo-de-muret es un plantage d'auto mountagno que trachis dins li pelouso e li coumbo à nèu. La maje-part di flour soun longo e primo e quauquis uno bèn mai courteto en triangle e dessecado à la flouresoun.

Usanço :
Coume forço plantage, l'erbo-di-muret es uno planto manjadisso e vertuouso. Li fueio se manjon en ensalado o cuecho, alor que li bouroun se podon adouba e manja coume de tapeno. Ei vertuouso pèr assana e souda li plago, li pougnaduro de tavan e d'un biais generau es astringènto e remoulissènto.

Port : Erbo
Taio : Pancaro entresigna
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Plantago
Famiho : Plantaginaceae

Ordre : Lamiales

Coulour de la flour : Jauno
Petalo : 4
Ø (o loungour) flour : Pancaro entresigna
Flourido : Estiéu

Sòu : Ca
Autour basso e auto : Pancaro entresigna
Aparado : Noun

Liò : Mountagno mejano - Auto mountagno
Estànci : Subaupen à Aupen
Couroulougi : Pancaro entresigna
Ref. sc. : Plantago alpina L., 1753 (= Plantago maritima subsp. alpina (L.) O.Bolòs & Vigo, 1983 )

Amelanchié

Amelanchier ovalis

Rosaceae

Àutri noum : Amelenquié, Avelanchié, Melanchié, Averanchié, Escoubo-d'iero.

Nom en français : Amélanchier.

Descripcioun :
L'amelanchié, qu'a douna lou noum en latin e francés, flouris belamen à la primo avans que de sourti si fueio. Aquésti soun roundo e dentado. Fai de pichot fru blu pièi negre.

Usanço :
Se saup bessai pas trop que li fru soun bon à manja. Tastas-lei e veirés qu'an bon goust se soun pas trop se. Li ramo servien, à passa tèms, à faire d'escoubo pèr neteja lis iero de cauco -Escoubo-d'iero- (O. Madon).